undirbúningur

​Undirbúningur fermingarveislunnar snýst ekki um að gera allt í einu, heldur að hafa yfirsýn. Hér fyrir neðan er farið yfir helstu atriði sem gott er að hafa í huga við skipulag fermingar. Þegar þú hefur kynnt þér þau getur verið gagnlegt að fara yfir tékklistann fyrir fermingarveislur og velja þau skref sem henta þinni fjölskyldu best.

 

Tímalínan

Undirbúningur fermingardagsins hefst oft fyrr en fólk gerir sér grein fyrir. Þótt fermingardagurinn sjálfur sé aðeins einn dagur, þá liggur yfirleitt að baki honum langur undirbúningur. Fyrstu skrefin snúast ekki um smáatriði, heldur um að ná yfirsýn og taka helstu ákvarðanirnar. Yfirleitt er skynsamlegt að hefja undirbúninginn um leið og fermingardagurinn liggur fyrir. Þá gefst nægur tími til að skoða valkosti, bera saman hugmyndir og taka ákvarðanir án tímapressu. Með því að byrja snemma má dreifa verkefnum jafnt yfir tímabilið og forðast að allt safnist upp á síðustu vikunum. Góður undirbúningur snýst ekki um að gera allt strax, heldur að vita hvað bíður og hvenær það þarf að vera klárt. Með skýrri tímalínu verður auðveldara að halda utan um verkefni og tryggja að ekkert gleymist.

​

Í upphafi fermingarársins er oft farið í stærri ákvarðanir, svo sem staðsetningu veislunnar og umfang hennar. Þegar nær dregur taka við praktísk atriði á borð við boðslista, veitingar og skipulag dagskrár. Á lokasprettinum færist áherslan yfir í fínstillingu, samræmingu og frágang.
 

Staðsetning

Þegar dagsetningin liggur fyrir hefst samkeppni foreldra um að taka frá sal fyrir veisluna. Veislan getur í mörgum tilfellum einnig verið heima eða jafnvel á veitingastað en staðsetningin mótar bæði stemningu dagsins og umfang skipulagsins. Með því að velja staðsetningu sem hentar fjölskyldunni og fermingarbarninu best skapast betri grundvöllur fyrir notalegan og vel heppnaðan dag. Þegar búið er að bóka sal skulið þið kanna með borðbúnað í salnum. Einnig er mikilvægt að huga að lengd dagsins, tímanum á milli athafnar og veislu og því hvernig fermingarbarnið upplifir daginn. Því er mikilvægt að hafa í huga klukkan hvað athöfninni lýkur og hvenær best er að hefja veisluna.

​

Hljóð og tækni

Þegar búið er að bóka veislusal þarf að kanna vel hvaða búnaður er til staðar. Gott hljóðkerfi er lykilatriði svo hljóðið berist vel út í sal.

​

Boðslisti og boð

Gestalistinn er einn mikilvægasti þáttur undirbúningsins og hefur áhrif á nær alla aðra þætti skipulagsins. Fjöldi gesta mótar stærð veislunnar, sem og veitingar og kostnað. Við gerð gestalistans er gott að ræða innan fjölskyldunnar og taka mið af óskum fermingarbarnsins. Sumir kjósa lítið, náið boð á meðan aðrir vilja stærri samveru með breiðari hópi.

Þegar gestalistinn liggur fyrir er hægt að ákveða hvernig boð verða send, hvort heldur sem er með hefðbundnum boðskortum eða rafrænum lausnum. Skýr boð, með góðum fyrirvara, auðvelda skipulag fyrir alla aðila.
 

Ábyrgð og verkaskipting

Undirbúningur veislunnar þarf ekki að vera á ábyrgð eins aðila. Með skýrri verkaskiptingu verður ferlið léttara og skipulagið skilvirkara.

Það getur verið gagnlegt að skipta verkefnum niður og fela mismunandi fjölskyldumeðlimum ákveðin hlutverk, svo sem veitingar, skreytingar eða samskipti við þjónustuaðila. Þannig fá fleiri að taka þátt og álagið dreifist jafnar. Skýr ábyrgð dregur úr misskilningi og tryggir að allir viti hvað þarf að gera og hvenær. Eins og Rikki ríki söng í Glanna glæp í Latabæ: „Þegar allir hjálpast að, þá verður lífið allt svo létt.“ Þá getur verið gott að biðja vini um að aðstoða ykkur með afmörkuð verkefni, sérstaklega þegar kemur að fráganginum.

 

Þátttaka fermingarbarnsins

Fermingin snýst fyrst og fremst um fermingarbarnið og því er mikilvægt að það fái að taka þátt í undirbúningnum. Þátttaka getur verið mismikil eftir aldri og áhuga, en jafnvel lítil aðkoma getur haft mikla þýðingu.

Með því að leyfa fermingarbarninu að hafa skoðun á ákveðnum þáttum, svo sem veislufyrirkomulagi, tónlist eða skreytingum, aukast líkurnar á að dagurinn endurspegli persónuleika þess og verði jákvæð upplifun.

Mikilvægt er að finna jafnvægi milli leiðsagnar og sjálfstæðis, þar sem barnið finnur að rödd þess skiptir máli án þess að bera ábyrgð á öllu skipulaginu.
 

Fjárhagsáætlun og forgangsröðun

Fermingarundirbúningur felur oft í sér töluverðan kostnað og því er skynsamlegt að setja skýran fjárhagsramma snemma í ferlinu. Með því verður auðveldara að taka ákvarðanir og forðast óþarfa áhyggjur.

Forgangsröðun hjálpar fjölskyldunni að einbeita sér að því sem skiptir mestu máli og sleppa því sem síður er nauðsynlegt. Með skýrum ramma má skapa fallega og eftirminnilega veislu án þess að fara fram úr eigin getu.
 

Hvað er gott að hafa klárt snemma?

Sum atriði er einfaldara og þægilegra að ganga frá tímanlega. Þegar þau eru kláruð snemma í ferlinu skapast meira svigrúm til að sinna smærri verkefnum þegar nær dregur deginum sjálfum.

Með því að ljúka stóru atriðunum snemma, svo sem staðsetningu, boðslista og gera gróft skipulag, verður undirbúningurinn markvissari og minni líkur á að eitthvað gleymist. Þetta skapar einnig rólegra andrúmsloft þegar fermingardagurinn nálgast.​